Toussaint Louverture

Toussaint Louverture, se papa entèlektyèl mouvman revolisyonè ki te bay peyi dAyiti endepandans. Listwa rapòte ke li te fèt Okap nan lane 1743. Li mouri lè li te pwal gen 60 an nan prizon nan peyi Lafrans, 7 avril 1803. Prizon an rele « Fort de Joux ».

Ansyen esklav, diplomat, gran gèrye, estratejis e taktisyen nan zafè lagè, li te fè blan kou nwa kou milat danse anwon, tèlman li jwe tout moun pou l te mete nou sou chimen endepandans. Li te menm rive mete tout reprezantan blan fransè yo deyò, menm Sonthonax, pou l te arive gen kontwòl tout il la (Ayiti ak Sen Domeng). Li te gen respè tout moun, e se gras a li tou ke ansyen esklav yo te arive genyen « La Guerre du Sud ».

« La Guerre du Sud » (Jen 1799 jiska Awout 1800), se yon moman istorik nan listwa peyi d Ayiti ke Ayisyen jiska prezan pa janm analize, e konsekans gè sa a nan nannan jan peyi a ye jis nan jounen jodi a. Se youn gè ki gen anpil aspè ladan li, militè, ideyolojik, ekonomik, e kilitrèl lè ou byen analize l. Kan ansyen afranchi yo te gen ladan l lidè kankou André Rigaud ak Alexandre Pétion. Ansyen esklav yo, anba lidèchip Toussaint Louverture, Jean-Jacques Dessalines, ak Henri Christophe, te genyen gè sa a plis ke youn lane aprè, nan mwa dawout 1800. Men, aprè Alexandre Pétion te asasine Dessalines nan lane 1806, epi Henri Christophe te touye tèt li nan lane 1820, se pwendvi ideyolojik ansyen afranchi yo (koumanse avèk Petion) ki te vin anrasine nan peyi dAyiti. Youn jou, lè istoryen Ayisyen deside pou yo fè etid relasyonèl ant peryòd gè sa a, ak jan Ayisyen panse de tèt yo nan jounen jodi a, lespri noutout ap kòmanse libere.

Youn nan pi gran kontribisyon Toussaint Louverture, se lè yo te fin arete l epi li te pwal nan prizon an Frans. Li te di youn bagay ke nou dwe panse sou li. Nou tout renmen di l an fransè : « En me renversant, on n’a abattu que le tronc de l’arbre de la liberté des noirs. Il repoussera par les racines parce qu’elles sont profondes et nombreuses ». Sa l te di a te tèlman vre ke efektivman, SaintDomingue te vin tounen Ayiti, te vin rele Ayiti jis nan jounen jodi a.

Ki sa l te vle di ? Toussaint te vle di nan bon fransè ke menmsi l mouri, batay la ap kontinye. Tout moun ki sou teren an, koumanse ak lidè ke l te kite yo, nèg konsekan kankou Dessalines ak Christophe, te ka mennen batay la jiska dènye viktwa a, premye janvye 1804. Se paske li pat wè tèt li sèlman nan batay la ke nou te rive gen endepandans. Li te prepare anpil moun, anpil lòt moun ki pou ta pran larelèv si l ta mouri. Efektivman, li te gen rezon. Toussaint te vle aprann nou tou ke nan youn batay, nan youn enstitisyon, nan kèlkilanswa sa w ap fè, se pa youn grenn moun ki ka fè travay la mache. Youn moun pa endispansab. Fòk toujou gen pepinyè, lòt moun k ap panse, anpil moun k ap panse, tout moun k ap panse sou menm chemen an pou viktwa a etènèl. Li te vle di nou ke lidèchip pa youn grenn moun. Lidèchip dirab, se youn gwoup moun ki toujou ap prepare lòt gwoup moun ozalantou youn konsèp inik, primòdyal, pou ka asire ke menmsi youn nan nou ale, ap toujou gen lòt kankou sa k ale a, e dwe gen lòt ki pi solid tou. Ekidonk, leson Toussaint Louverture la, se pou pa janm konstri youn enstitisyon, kèlkeswa enstitisyon an, pou se youn sèl moun ki gen lavwa. Se youn ansanmb ki fè lidèchip, se pa youn sèl grenn moun.