Kite powèm sa fofile

Antre plake nan tablo kè w,

Se nan pòt santiman w li vle pase

Pou chak grenn wyayèl ka soufle

Yon pawòl lespwa nan tenpan zorèy ou

Pou chak silab ka limen

Yon pwojektè sou boulva lavi w pou diw

Nan mitan 8 milya vwazen,

Se ou ki pi bèl e Tout zwazo konn sa.

 Lalin ak douvanjou deja fè eskonbrit nan non w ;

Nan mitan yon syèl dezespwa

Ou se sèl grenn zetwal k ap pote limyè.

Kwè nan tèt, ou ou kapab !

Ou se yon nanm vivan,

Move van vag lanmè twò piti,

Pou bloke boulvèse vwayaj ou.

Ou te mèt soti lavil ou  nan twou zonbi,

Kelkeswa koulè po w,

Kelkeswa fanmi ou soti,

Kwè nan tėt ou, ou kapab !

Pa pè gonfle blad lavi,

Menmsi ou ta yon avèg

Yon koko pye koupe

Sou bekiy ou sou chèz woulant,

Kelkeswa maladi w,

Kwè nan tèt ou, ou kapab !

Pa pè satiyèt lavi toujou gen yon bagay ou ka fè,

Nan mitan tout toubouyon enposibilite,

Gen yon dividal posibilite k’ap boujounen.

Toujou panse wo, byen wo, pi wo Pase nyaj yo.

Pa kite somèy dekourajman pote fòs ou ale

Avèk souf ki nan ou a

Ou ka vin yon gason total,

Ou ka vin yon fanm kapital,

Ou mèt geri bosko w nan gou w,

Ou se kaptenn bato lavi w,

Ou se pemye patwon tèt ou,

Ou se direktè, administratè, sipèvizè la vi w,

Pa kwè nan bèl pawoli pwomès piwili nèg sou pouvwa.

Kwè nan tèt ou, ou kapab !

Puisans panse w pa two piti

Pou chavire linivè nan plan men w,

 lamizè pa dwe   jwenn plas

Pou kwaze pye li douvan ekran je w

Kwè nan tèt kounya

Yon jou tout moun pral sezi wè w

W’ap tankou pipirit douvanjou

K’ap chante sou lawouze banda

Nan lorizon krepiskil solèy,

Se la wa kwaze pye w pou dodine.

Latè rele w pa w pa kite traka lavi

Fè mikalaw nan tèt ou.

Kenbe tout foli w nan pwent zorèy,

Dòmi ak pasyon w anba tèt ou.

Lavi a son match foutbòl

Gonfle balon w pou w ranpòte lamayòl.

Byen jwe pou w trible tout anndan vant lavi

Pou w ka rive chanpyon ;

Kwè nan tèt ou, ou kapab !

Pa pè loraj pa pè zeklè,

Pa komanse pè pou w pa vin pè.

Kwè nan tèt ou se sèl fason

Pou restore prezans lespwa nan fon kè w,

Aprann fè chak bout nuit yon konfidans

Kase randevou ak pasyans nan kafou delivrans

Se nan pye w bato bonè pral vin jete lank

Kwè nan tèt ou si ouvle rive kote ou vle.

Kwè nan tèt ou ou kapab !